Nesjavallalína 2
Framkvæmdum er lokið við lagningu Nesjavallalínu 2, 132 kV jarðastrengs milli Nesjavalla og tengivirkis Landsnets á Geithálsi. Strengurinn er 25 km langur og er lengsti 132 kV jarðstrengur sem lagður hefur verið hérlendis og tryggir afhendingaröryggi orku frá Nesjavallavirkjun.
Tryggir afhendingaröryggi
Nesjavallalína 2 tryggir afhendingaröryggi orku frá Nesjavallavirkjun inn á meginflutningskerfi Landsnets og léttir jafnframt álagi af Nesjavallalínu 1 en jarðstrengshluti þeirrar línu var orðinn fulllestaður, og kominn að hættumörkum, eftir að Nesjavallastöðin var stækkuð í 120 MW.
Borað fyrir strengjum til að minnka jarðrask
Nesjavallalína 2 liggur um sveitarfélögin Grímsnes- og Grafningshrepp, Sveitarfélagið Ölfus, Mosfellsbæ og Reykjavík og var strengurinn að hluta til grafinn niður meðfram hitavatnslögninni frá Nesjavöllum til að lágmarka umhverfisáhrif. Framkvæmdin var ekki háð mati á umhverfisáhrifum, samkvæmt mati Skipulagsstofnunar, en mikil áhersla var lögð á að halda öllu raski í lágmarki við lagningu strengsins. Var m.a. borað fyrir honum á sex stöðum í gegnum fjallasvæði Dyrafjalla á Hengilssvæðinu til að lágmara jarðrask.
Framkvæmdir við Nesjavallalínu 2 hófust í júní 2009, útlögn strengja hófst 20. júlí og lauk 6. nóvember. Unnið var við yfirborðsfrágang fram í desember og lokafrágangur yfirborðs fer fram í vor.
Útlagning gekk hratt og vel
Háspennustrengurinn var keyptur af sænska Ericsson AB og sáu starfsmenn á þeirra vegum um samtengingar á honum. Ístak annaðist alla jarðvinnu og útlagningu á strengnum og þjónustaði jafnframt starfsmenn Ericsson við samtengingar á strengnum.
Um 55 manns unnu að jafnaði við lagningu jarðstrengsins. Gekk útlögn hans hratt og vel fyrir sig og voru að jafnaði lagðir um 2 km á viku. Verktakinn notaði tvær gröfur til að draga strenginn út af hverri rúllu og spil og kefli þar sem það var nauðsynlegt í skurðinum.
Verkfræðistofan Efla annaðist hönnun Nesjavallalínu 2 en umsjón og eftirlit með verkinu var í höndum verkfræðistofunnar Strendings og Rafskoðunar. Verkís sá um hönnun á tengivirki við Nesjavallastöð, Mannvit sá um hönnun endavirkis á Geithálsi.
Umhverfisúttekt
Umhverfisúttekt fer fram á framkvæmd verksins vorið 2010.
Í stuttu máli
- Nesjavallalína 2, jarðstrengurinn frá Nesjavöllum að Geithálsi, er 24,6 km löng.
- Jarðstrengurinn er grafinn niður og á nokkrum viðkvæmum stöðum á Hengilssvæðinu var borað fyrir strengnum.
- Strengurinn er hannaður fyrir 140 MVA flutningsgetu.
- Jarðstrengurinn liggur um sveitarfélögin Grímsnes- og Grafningshrepp, Sveitarfélagið Ölfus, Mosfellsbæ og Reykjavík.
- Við undirbúning og framkvæmd verkefnisins var lögð sérstök áhersla á öryggis- og umhverfismál.
- Engin óhöpp urðu við framkvæmdina og sérlega vel tókst til við að raska sem minnstu í náttúrunni og skilja vel við landið. Stefna Landsnets skilaði sér því vel í þessu verkefni.
- Umhverfisúttekt fer fram á framkvæmd verksins vorið 2010.