Því miður geta komið upp þau atvik þar sem sinna þarf bráðaviðhaldi á flutningslínum með tilheyrandi röskun fyrir raforkunotendur.

Flutningslínur geta laskast vegna veðurs eða hrörnunar án þess að truflun verði á línu og því mikilvægt að upplýsingum um slíkt sé komið til réttra aðila.

Eitt slíkt atvik kom upp í gær þann 24. febrúar þegar tilkynning barst um að eitthvað hefði úr lagi gengið á einni burðarstæðu í 33 kV Húsavíkurlínu.

Húsavíkurlína liggur frá Laxárstöð að Húsavík og sér Húsavík og nágrenni fyrir rafmagni.

Við skoðun á línunni kom í ljós að einangri hafði brotnað og hafði leiðarinn við það fallið niður með burðarstaur en þó án þess að truflun yrði á línunni (sjá meðfylgjandi mynd).

Veðurspá og aðstæður á staðnum voru þess eðlis að ekki þótti verjandi annað en að taka línuna út með mjög skömmum fyrirvara og sinna viðgerð.

Línan var tekin úr rekstri kl: 14:30 og var komin aftur í rekstur aftur kl: 15:00.

Starfsmenn Rarik á Akureyri sáu um viðgerð á línunni. Landsnet kann starfsmönnum Rarik ásamt þeim sem upplýstu um bilun bestu þakkir fyrir góð og skjót viðbrögð.