Upprunaábyrgð á raforku sem framleidd er með endurnýjanlegum orkugjöfum

Upprunaábyrgð er staðfesting á að raforka sé framleidd með endurnýjanlegum orkugjöfum, þ.m.t. vindorku, sólarorku, jarðvarmaorku, öldu- og sjávarfallaorku, vatnsorku og orku úr lífmassa, hauggasi, gasi frá skólphreinsunarstöðvum og lífgasi, en ekki orkugjöfum úr jarðefnaeldsneyti. Upprunaábyrgðir geta gengið kaupum og sölum frá því þær eru gefnar út til viðkomandi framleiðanda og þar til endanlegur kaupandi "notar" þær í þeim tilgangi að sýna að hann styðji við bakið á grænni framleiðslu. Hvatinn fyrir slíkt getur verið margvíslegur, allt frá lagalegri skyldu að uppfylla ákveðinn grænan kvóta og til þess að vilja sýna út á við, t.d. í auglýsingaskini, að viðkomandi ýti undir nýtingu á endurnýjanlegum orkugjöfum við framleiðslu raforku.


Landsnet hefur samkvæmt lögum um upprunaábyrgð á raforku sem framleidd er með endurnýjanlegum orkugjöfum o.fl. það hlutverk að annast útgáfu upprunaábyrgða á Íslandi og mun hefja þá útgáfu á þessu ári.

Landsnet mun halda vinnustofu um upphaf útgáfu upprunaábyrgða dagana 19. og 20. maí næstkomandi og er dagskrá væntanleg hér á síðuna fljótlega.