image
26.08.2020

Raforkuverð vegna flutningstapa

Raforkuverð vegna flutningstapa verður 4.218 kr/MWst fyrir fjórða ársfjórðung 2020.

Nýverið voru opnuð tilboð í raforku sem áætlað er að muni tapast á þriðja ársfjórðungi, en Landsnet býður fjórum sinnum á ári út alla þá orku sem tapast í flutningskerfinu.

Flutningstöp er sú raforka sem tapast vegna viðnáms í raflínum og spennum í raforkuflutningskerfinu. Um 2% þeirrar raforku sem mötuð er inn á kerfið tapast á leið til notenda. Sú raforka samsvarar um 400 GWst/ári sem jafngildir framleiðslu Kröflustöðvar eða raforkunotkun um 1.500 rafmagnsbíla á einu ári. Samkvæmt raforkulögum nr. 65/2003 ber Landsneti að útvega rafmagn í stað þess sem tapast í kerfinu.

Boðnar voru út tvenns konar vörur. Annars vegar er um að ræða grunntöp með fullum nýtingartíma og hins vegar eru það viðbótartöp með 41% nýtingartíma og sveigjanleika sem nemur magn aukningu
eða – minnkun um +/- 30%. Alls voru um 90 GWst af raforku boðin út en það er sú raforka sem áætlað er að tapist í flutningskerfinu á næsta ársfjórðungi. Á sama tímabili 2019 voru boðin út 93 GWst. 

Meðalverð þessa útboðs lækkar um 8,5% miðað við sama tíma í fyrra en hækkar um 11,4% frá síðasta ársfjórðungi. Raforkuverð vegna flutningstapa á fjórða ársfjórðungi 2020 verður 4.218 kr/MWst.

Gjald vegna flutningstapa fyrir sama tímabil verður 85,57 kr. á MWst og er 12% lægra en fyrir sama tímabil í fyrra en hækkar um 6,4% milli ársfjórðunga. 

Að þessu sinni var samið  við fjóra raforkusala, HS Orku, Íslenska orkumiðlun, Landsvirkjun og Orku náttúrunnar á grundvelli þeirra tilboða sem bárust og er heildarkostnaður um 381 millj. kr. Til að geta tekið þátt í rafrænum útboðum á raforku vegna flutningstapa þurfa raforkusölufyrirtæki að gera rammasamning við Landsnet. Rammasamningur skyldar þó ekki fyrirtæki til þess að taka þátt í útboðunum, enda er það val hvers sölufyrirtækis hverju sinni. Í dag eru 5 raforkusalar með rammasamning við Landsnet: HS Orka, Íslensk orkumiðlun, Landsvirkjun, Orka náttúrunnar og Orkusalan.

Öll tilboð sem bárust vegna útboðsins eru birt  hér á vefnum og þar er hægt að skoða nánar dreifingu tilboða og bera saman við tilboð fyrri útboða.

Fannst þér efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Landsnets. Hikaðu ekki við að hafa samband ef þig vantar aðstoð.

Af hverju ekki?