image
17.11.2021

Raforkuverð vegna flutningstapa

Raforkuverð vegna flutningstapa verður 5.923 kr/MWst fyrir fyrsta ársfjórðung 2022, hækkar um 25% miðað við sama tíma í fyrra.

Nýverið voru opnuð tilboð í raforku sem áætlað er að muni tapast á fyrsta ársfjórðungi næsta, en Landsnet býður fjórum sinnum á ári út alla þá orku sem tapast í flutningskerfinu.

Flutningstöp er sú raforka sem tapast vegna viðnáms í raflínum og spennum í raforkuflutningskerfinu. Um 2% þeirrar raforku sem mötuð er inn á kerfið tapast á leið til notenda. Sú raforka samsvarar um 400 GWst/ári sem jafngildir framleiðslu Kröflustöðvar eða raforkunotkun um 150.000 rafmagnsbíla á einu ári. Samkvæmt raforkulögum nr. 65/2003 ber Landsneti að útvega rafmagn í stað þess sem tapast í kerfinu.

Boðnar voru út tvenns konar vörur. Annars vegar er um að ræða grunntöp með fullum nýtingartíma og hins vegar eru það viðbótartöp með 55% nýtingartíma og sveigjanleika sem nemur magn aukningu eða – minnkun um +/- 30%. Alls voru um 98 GWst af raforku boðin út en það er sú raforka sem áætlað er að tapist í flutningskerfinu á næsta ársfjórðungi. Fyrir sama tímabil í fyrra var boðin út nokkuð minni orka, en flutningstapið hefur færst í aukana undanfarin misseri vegna meiri innmötunar og óvenju mikils flutnings frá austri til vesturs eftir Byggðalínunni sem stafar af lágri vatnsstöðu á virkjanasvæði Þjórsár.

Meðalverð þessa útboðs hækkar um 25% miðað við sama tíma í fyrra. Raforkuverð vegna flutningstapa á fyrsta ársfjórðungi 2022 verður 5.923 kr/MWst. Gjald vegna flutningstapa fyrir sama tímabil verður 117,91 kr. á MWst og hækkar úr 102,53 kr. á MWst, eða um 15% milli ársfjórðunga og um 25% frá sama tímabili í fyrra.

Að þessu sinni var samið við fjóra raforkusala, Íslenska orkumiðlun, Landsvirkjun, Orku náttúrunnar og Straumlind á grundvelli þeirra tilboða sem bárust og er heildarkostnaður um 579 millj. kr. Til að geta tekið þátt í rafrænum útboðum á raforku vegna flutningstapa þurfa raforkusölufyrirtæki að gera rammasamning við Landsnet. Rammasamningur skyldar þó ekki fyrirtæki til þess að taka þátt í útboðunum, enda er það val hvers sölufyrirtækis hverju sinni. Í dag eru 6 raforkusalar með rammasamning við Landsnet: HS Orka, Íslensk orkumiðlun, Landsvirkjun, Orka náttúrunnar, Orkusalan og Straumlind og bárust tilboð frá þeim öllum að Orkusölunni undanskildir.

Öll tilboð sem bárust vegna útboðsins eru birt  hér á vefnum og þar er hægt að skoða nánar dreifingu tilboða og bera saman við tilboð fyrri útboða.

Fannst þér efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Landsnets. Hikaðu ekki við að hafa samband ef þig vantar aðstoð.

Af hverju ekki?