Verkefnið felst í að reisa 220 kV loftlínu, samtals um 100 km langa, Blöndulínu 3 frá Blöndu að Rangárvöllum á Akureyri. 

Línan tengist inn í tengivirkið á Rangárvöllum með jarðstreng og fer um fjögur sveitarfélög: Akureyrarbæ, Hörgársveit, Sveitarfélagið Skagafjörð og Húnabyggð. Einnig verður byggt nýtt 220 kV tengivirki við Blöndu. 

Tilgangur framkvæmdarinnar er að bæta afhendingaröryggi í meginflutningskerfinu, auka sveigjanleika þess og möguleika til að miðla orku milli landshluta. Núverandi lína er komin til ára sinna og samræmist illa þeim kröfum sem nútímasamfélag gerir til raforkuflutningsmannvirkja og tiltæki orkuafhendingar. Ný byggðalína mun enn fremur minnka töp í flutningskerfinu ásamt því að auka möguleika á uppbyggingu orkufrekrar atvinnustarfsemi. 

Framkvæmdin er hluti af byggingu nýrrar byggðalínu sem kemur til með að tengja saman flutningskerfið á Suðvesturlandi og flutningskerfi og framleiðslustaði raforku á Norður- og Austurlandi. Umhverfismatsskýrsla var gefin út fyrir verkefnið og gaf Skipulagsstofnun út álit í desember 2022. Skipulagsmál eru langt komin í öllum sveitarfélögum og samningaviðræður við landeigendur í gangi.

Stefnt er að því að hefja framkvæmdir sumarið 2027 og að Blöndulína 3 verði spennusett í lok árs 2029.