Mannauðs- og mannréttindastefna

Framtíðarsýn

Landsnet vill vera eftirsóknarverður vinnustaður þar sem starfsfólk upplifir öryggi, virðingu og tækifæri til þróunar.

Við byggjum á gildum okkar – samvinnu, virðingu og ábyrgð – og leggjum áherslu á jafnræði, sanngirni og uppbyggilega vinnustaðamenningu.

Stefnan nær til alls starfsfólks og er órjúfanlegur hluti af Heildarstefnu Landsnets. Hún er endurskoðuð reglulega og þróast í takt við stefnu Landsnets, þarfir starfsfólks og breytingar í laga- og rekstrarumhverfi.

Áhersla í mannauðsmálum

Við:

  • Stýrum mannauðsmálum með langtímasýn og skýrum verkferlum.
  • Styðjum starfsfólk í þróun og ábyrgum vinnubrögðum.
  • Tryggjum jöfn tækifæri og vinnum markvisst að fjölbreytni og inngildingu.
  • Byggjum upp menningu trausts, samvinnu og uppbyggilegra samskipta.
  • Leggjum áherslu á andlega og líkamlega vellíðan og jafnvægi milli vinnu og einkalífs.
  • Nýtum mælingar og endurgjöf til stöðugra umbóta.

Virði mannauðsmála og mannréttinda

Við tryggjum að mannréttindi og jafnrétti séu virt í allri starfsemi.

Við:

  • Þróum hæfni starfsfólks með markvissri fræðslu og starfsþróun.
  • Tryggjum að laun og starfskjör byggi á málefnalegum og gagnsæjum viðmiðum.
  • Tryggjum að ráðningarferli sé faglegt, gagnsætt og byggt á hæfni.
  • Notum hlutlaust orðalag í starfsauglýsingum og hvetjum öll til að sækja um störf.
  • Gætum þess að jafnréttissjónarmið vegi jafnt við ráðningar og að umsækjendum sé ekki mismunað.
  • Vinnum gegn allri mismunun.
  • Mælum reglulega starfsánægju og notum niðurstöður til umbóta.
  • Viðhöldum skýrum viðbrögðum gegn einelti, kynbundinni áreitni, kynferðislegri áreitni og ofbeldi (EKKO).

Jafnlaunastefna

Jafnlaunastefna Landsnets nær til alls starfsfólks og er órjúfanlegur hluti af þessari stefnu, ásamt Starfskjarastefnu og Jafnréttisáætlun.

Við tryggjum starfsfólki jöfn kjör og tækifæri og greiðum samkeppnishæf laun sem eru sambærileg við það sem gerist á markaði, án þess að vera leiðandi.

Laun byggja jafnframt á þeirri meginreglu að greidd séu jöfn laun fyrir sömu eða jafnverðmæt störf og rekum við vottað jafnlaunakerfi samkvæmt ÍST 85.

Launaákvarðanir byggja á málefnalegum og gagnsæjum viðmiðum, virðingu fyrir starfsfólki og gildandi lögum og reglum um jafnrétti og bann við mismunun. Sanngirni og samfélagsleg ábyrgð eru leiðarljós okkar í kjaramálum.

Við leggjum áherslu á þátttöku í kjararannsóknum og byggjum launaþróun á markaðsgögnum og reglulegum greiningum.

Við:

  • Framkvæmum árlega launagreiningu.
  • Kynnum niðurstöður fyrir starfsfólki.
  • Bregðumst við frávikum með úrbótum og eftirfylgni.
  • Viðhöldum stöðugum umbótum á jafnlaunakerfinu.

Stefna gegn einelti, áreitni og ofbeldi (EKKO)

EKKO stefna þessi er hluti af Mannauðs- og mannréttindastefnu Landsnets og nær sem slík til alls starfsfólks og annarra aðila sem kunna að starfa fyrir Landsnet, svo sem verktaka, ráðgjafa og nema.

Skilgreiningar:

  • Einelti er síendurtekin hegðun sem almennt er til þess fallin að valda vanlíðan hjá þeim sem fyrir henni verður, svo sem að gera lítið úr, móðga, særa eða ógna viðkomandi eða að valda honum ótta. Háttsemin á sér stað yfir tiltekið tímabil og hefur margs konar birtingarform. Skoðanaágreiningur eða ágreiningur vegna ólíkra hagsmuna fellur ekki hér undir.
  • Kynbundið áreiti eða ofbeldi er hvers kyns ósanngjörn og/eða móðgandi hegðun, sem tengist kyni þess sem fyrir henni verður, er í óþökk viðkomandi og hefur þann tilgang eða þau áhrif að misbjóða virðingu þess sem fyrir henni verður og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi fyrir viðkomandi.
  • Kynferðisleg áreitni er hvers kyns kynferðisleg hegðun sem er í óþökk þess sem fyrir henni verður og hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, táknræn eða líkamleg.
  • Ofbeldi er hvers kyns hegðun sem leiðir til, eða gæti leitt til líkamlegs eða sálræns skaða eða þjáninga sem fyrir henni verður, einnig hótun um slíkt, þvingun eða handahófskennda sviptingu frelsis.

Öll hegðun sem fellur undir ofangreindar skilgreiningar er óheimil og verður undir engum kringumstæðum umborin.

Útgefið í februar 2026