Við hjá Landsneti og Landsbjörg skrifuðum þann 12. desember undir samstarfssamning sem miðar að því að efla samstarf okkar og styrkja viðbragðsgetu í krefjandi aðstæðum.
Samningurinn felur í sér að við veitum Landsbjörgu fjárhagslegan stuðning til eflingar á innra starfi samtakanna. Jafnframt munum við veita félögum Landsbjargar fræðslu um rafmagnshættur sem geta komið upp við verkefni þeirra, meðal annars á hálendi landsins.
Í samningnum er einnig kveðið á um að Landsbjörg geti veitt okkur liðsstyrk við alvarlegar truflanir í raforkukerfinu þegar þörf er á auknum mannafla, gegn sérstakri greiðslu fyrir slíka þjónustu.
Samstarf okkar við Landsbjörg hefur verið farsælt í gegnum árin og endurspeglar samningurinn sameiginlegan vilja okkar til að styrkja öryggi og viðbúnað.