Flutningsgjaldskrá Landsnets til dreifiveitna, og þar með almennings, var ekki hækkuð um áramótin og var sú ákvörðun tekin með tilliti til þeirrar umræðu sem er í þjóðfélaginu vegna baráttunnar gegn verðlagshækkunum.
Gjaldskrá Landsnets er fyrir flutning á raforku annars vegar og kerfisþjónustu hins vegar. Eingöngu var samþykkt breyting á gjaldskrá til stórnotenda, þ.e. aðila eins og álvera, gagnavera og kísilverksmiðja, sem nota a.m.k. 80 gígavattstundir (GWh) á ári. Stórnotendagjaldskráin er í bandaríkjadölum en flutningsgjaldskráin til almennings, sem dreifiveiturnar greiða, er í íslenskum krónum.
Sá hluti gjaldskrárinnar sem tekur til kerfisþjónustuhlutverks Landsnets nær til kostnaðar vegna tapa og svokallaðs reiðuafls í kerfinu. Kostnaðurinn er greiddur af þeim sem nota kerfið og hefur Landsnet efnt til útboða árlega á samkeppnismarkaði. Nemur hann um 10% af flutningsverðinu til dreifiveitna og er eins konar gegnumstreymisliður. Skal gjaldskrá kerfisþjónustunnar taka mið af kostnaði, ásamt hæfilegri þóknun, en eftir útboð sem fram fór í lok síðasta árs lágu fyrir breytt verð þar sem raforkuframleiðendur hækkuðu verð nokkuð.
Þar sem Landsnet hefur eingöngu stjórn á ákvörðun þóknunar vegna þessarar gjaldskrár – sem nemur aðeins 1,5% af umræddum gjaldskrárlið – er fyrirtækinu ekki leyfilegt að lækka þennan hluta gjaldskrárinnar sérstaklega. Til að gjaldskrá Landsnets vegna kerfisþjónustu og flutningstapa lækki þurfa raforkuframleiðendur að lækka verðtilboð sín og þá mun Landsnet í kjölfarið lækka þennan hluta gjaldskrárinnar.
Allt frá stofnun hefur Landsnet lagt áherslu á hagræðingu í starfseminni. Grundvöllur gjaldskrárinnar er settur í raforkulögum og hefur hún aldrei fylgt almennri verðlagsþróun, þar sem veruleg hagræðing hefur verið í starfseminni.
Að lokum skal áréttað að raforkunotendur, sem vilja kynna sér hversu há flutningsgjöldin eru, geta nýtt sér reiknivél Landsnets hér (http://www.landsnet.is/raforkukerfid/flutningsgjaldskra/reikniveldreifiveitur/) á vefnum. Þar er hægt að slá inn rafmagnsnotkun og sjá í framhaldinu hversu há flutningsgjöldin eru miðað við gildandi gjaldskrá hverju sinni.