Landsnet og Norræni fjárfestingarbankinn (NIB) hafa skrifað undir samning um lán að fjárhæð 35 milljónir Bandaríkjadala, sem jafngildir um 4,2 milljörðum króna.
Láninu er ætlað að fjármagna lagningu jarðstrengs á milli Akureyrar og Dalvíkur með það að markmiði að styrkja flutningskerfið á því svæði svo og á Suðurlandi, þar sem unnið er að bættum tengingum á milli Hellu og Landeyja og nýrra sæstrengja frá Landeyjum yfir til Vestmannaeyja.
Framkvæmdirnar munu styrkja núverandi flutningskerfi og auka flutningsgetu á báðum svæðunum ásamt því að auka orkuöryggi fyrir íbúa og atvinnulíf.
Mynd: Jeanette Vitasp, yfirmaður lánamála hjá Norræna fjárfestingarbankanum, og Ragna Árnadóttir, forstjóri Landsnets, handsala samninginn við undirskrift.
Guðlaug Sigurðardóttir, framkvæmdastjóri fjármála og árangurs:
„Við hjá Landsneti leggjum mikla áherslu á að styrkja flutningskerfi raforku á þann hátt sem nýtist bæði almenningi og atvinnulífi á þeim svæðum sem um ræðir. Öflugra kerfi gerir okkur kleift að mæta nýjum áskorunum í orkuumhverfinu, nýta betur auðlindir og auka öryggi í orkuafhendingu. Fjármögnunin sem hér um ræðir tengist verkefnum sem styrkja flutningskerfið á Norður- og Suðurlandi og tengjast sérstaklega afhendingaröryggi á þeim svæðum.
Með nýjum sæstrengjum til Vestmannaeyja eykst flutningsgeta kerfisins þangað og þannig er stutt við frekari þróun atvinnulífs á svæðinu. Þessi verkefni eru einnig mikilvægir hlekkir í styrkingu og uppbyggingu kerfisins í heild sem styður við aukið orkuöryggi og öruggari flutning raforku á milli landshluta. Í framkvæmdum Landsnets er horft til þess að bæta nýtingu orkuauðlinda, minnka losun sem tengist flutningi raforku, sýna ábyrgt verklag í umhverfismálum og styðja við atvinnulíf og samfélög á þeim svæðum sem um ræðir.
Norræni fjárfestingarbankinn hefur verið traustur samstarfsaðili okkar í mörg ár. Það er ánægjulegt að samstarfið endurspegli bæði okkar markmið og sjálfbærniviðmið bankans í loftslagsmálum. Samningurinn sem nú hefur verið undirritaður er sterkt merki um það traust sem bankinn ber til Landsnets og þeirra áætlana sem við höfum sett okkur í umhverfis- og loftslagsmálum.“