Samið um kaup á raforku vegna flutningstapa

Landsnet hefur samið um kaup á raforku vegna flutningstapa fyrir fyrstu sex mánuði  ársins 2017 á grundvelli tveggja útboða frá því í nóvember.

Flutningstöp er sú raforka sem tapast vegna viðnáms í flutningslínum og spennum í flutningskerfinu. Um 2,2% þeirrar raforku sem mötuð er inn á kerfið tapast á leið til notenda.

Orka vegna tapa í flutningi raforku  hefur verið boðin út til eins árs í senn frá stofnun Landsnets. Á árunum 2015 og 2016 fengust ekki tilboð í alla útboðna orku og í kjölfarið var skoðað með hvaða hætti  Landsnet gæti brugðist við því til að tryggja öryggi raforku.  Ákveðið var að bjóða út oftar og stytta útboðstímabilið og fá þannig  þéttari endurgjöf á verð til markaðsaðila og gera þeim kleift að notast við gögn nær rauntíma.  

Í undirbúningi er jafnframt rafrænt innkaupaferli sem tekið verður í notkun næsta vor, þannig verður hagkvæmni og skilvirkni innkaupanna aukin.

Boðið var út í tvígang -  í fyrra útboði bárust tilboð í um 95% orkunnar og í því seinna komu tilboð í þá orku sem vantaði upp á. Þrír aðilar tóku þátt í útboðinu; HS orka, Landsvirkjun og Orka náttúrunnar.

Boðin voru út grunntöp, afl með fullan nýtingartíma og viðbótartöp með breytilegan nýtingartíma.

Mánuður	Afl (MW)
Janúar	38
Febrúar	38
Mars	35
Apríl	34
Maí	34
Júní	32

 

Fjórðungur	Afl (MW)	Orka (MWh)	Nýtingartími (klst.)
Q1	15	16.200	1.080
Q2	17	17.700	1.041

 

Heildarkostnaður kaupanna var rúmar 926 milljónir króna, þar af grunntöp 698 milljónir króna og viðbótartöp 228 milljónir króna. Meðalverð orku vegna flutningstapa hækkaði um 9% miðað við fyrstu sex mánuði ársins 2016. Meðalverð á grunntöpum stendur nokkurn veginn í stað en meðalverð vegna viðbótatapa hækkar um 19%.

Áætlun hefur verið gerð fyrir árið 2017 sem gefur að hækka þurfi gjald vegna flutningstapa. Landsnet hefur því ákveðið að hækka skuli gjaldskrá vegna flutningstapa um 10,5% þann 1. janúar 2017 með fyrirvara um athugasemdir frá Orkustofnun.