Stemningin í herbúðum Team Landsnet er rafmögnuð í augnablikinu enda styttist í að strákarnir leggi af stað í Wow Cyclothon keppninni.

Gallup hefur framkvæmt rannsókn fyrir Landsvirkjun sem gefur sterka vísbendingu um jákvætt viðhorf erlendra ferðamanna til endurnýjanlegrar orkuvinnslu á Íslandi. Samkvæmt könnuninni eru 97% erlendra ferðamanna jákvæð í garð endurnýjanlegra orkugjafa hér á landi. Rannsóknin var framkvæmd á netinu og voru þátttakendur 1.014 talsins.

Stórnotendur flutningskerfis Landsnets greiða að jafnaði minna en notendur í öðrum Evrópulöndum. Þetta kemur fram í nýjustu tölum Evrópusamtaka flutningsfyrirtækja. Samorka hefur nýlega vakið athygli á nýjum tölum sem sýna að raforkukostnaður íslenskra heimila er sá lægsti í Vestur-Evrópu og að flutningsgjald raforku á Íslandi til stórnotenda sé undir meðaltali.

Við leitum að öflugum verkefnastjóra gæðamála og samfélagsábyrgðar á verkefnastofu Landsnets. Gæðamál og samfélagsábyrgð eru forgangsmál hjá Landsneti og verkefnastjóri verður lykilaðili í þróun þessara málaflokka til framtíðar. Í boði er krefjandi starf í umhverfi sem er í hraðri mótun.

Landsnet vinnur að undirbúningi við mótun kerfisáætlunar 2016-2025 samkvæmt raforkulögum nr. 65/2003.

Meirihluti Hæstaréttar felldi í dag úr gildi stjórnvaldsákvarðanir iðnaðarráðherra frá 24. febrúar 2014 er heimiluðu Landsneti að taka land eignarnámi á fimm jörðum á Reykjanesi vegna byggingar Suðurnesjalínu 2. Niðurstaða dómsins kemur Landsneti á óvart. Hún seinkar brýnum framkvæmdum við uppbyggingu flutningskerfis raforku til Suðurnesja.

Landsnet gekk í dag frá samningi að verðmæti 1,2 milljarðar króna vegna tengingar iðnaðarsvæðisins á Bakka við Húsavík við Þeistareykjavirkjun og raforkuflutningskerfið.

Kerfisáætlun Landsnets samræmist skilyrðum raforkulaga. Þetta er niðurstaða Orkustofnunar sem samkvæmt raforkulögum hefur það hlutverk að fara yfir og samþykkja kerfisáætlun Landsnets með hliðsjón af markmiðum um öryggi, skilvirkni, áreiðanleika afhendingar, hagkvæmni, gæði raforku og stefnu stjórnvalda um lagningu strengja.

Frammistöðuskýrsla fyrir árið 2015 er komin út og er aðgengileg á heimasíðu Landsnets. Í skýrslunni er að finna tölfræðilegar upplýsingar um rekstur flutningskerfis Landsnets í fyrra og samanburð við 10 ár þar á undan, jafnframt því sem hún tekur mið af kröfum um gæði raforku og afhendingaröryggi.

Kristveig Þorbergsdóttir er fyrsta konan sem öðlast réttindi sem rofastjóri hjá Landsneti og þar með halda karlavígin áfram að falla eitt af öðru.

Landsnet vísar á bug ásökunum um að hafa eignað sér lögverndaða hönnun fyrirtækisins Línudans á háspennumöstrum eins og greint var frá í fréttum Ríkissjónvarpsins sunnudaginn 17. apríl sl.

Rannsóknir sem Landsnet og íslensk orkufyrirtæki hafa staðið að um langt skeið um áhrif alvarlegra ísingartilvika voru til umfjöllunar á alþjóðlegri ráðstefnu í Charlotte í Bandaríkjunum fyrir helgi um hönnun og úrbætur á háspennuloftlínum.

Sjálfvirkar stýringar í flutningskerfi Landsnets, svokallaðar snjallnetslausnir, gerðu fyrirtækinu kleift að flytja orku umfram skilgreind stöðugleikamörk á liðnu ári sem samsvarar raforkunotkun um 50 þúsund rafbíla. Ella hefði þurft að skerða raforku til notenda sem þessu nemur til að tryggja öruggan kerfisrekstur.

Helstu sérfræðingar heimsins í þróun og hönnun háspennumastra úr trefjaefni báru saman bækur sínar á þriggja daga vinnufundi hérlendis fyrir helgi í samstarfi við Landsnet, sem átti nokkra fulltrúa á fundinum.

Fyrirtækið Metalogalva í Portúgal átti lægsta tilboðið í stálmöstur þriggja háspennulína Landsnets, Kröflulínu 4, Þeistareykjalínu 1 og Suðurnesjalínu 2, en alls bárust 15 tilboð í möstrin og voru 12 þeirra undir kostnaðaráætlun.

Sigrún Björk Jakobsdóttir, hótelstjóri á Icelandair hótelinu á Akureyri, er nýr formaður stjórnar Landsnets. Hún tekur við af Geir A. Gunnlaugssyni, fyrrverandi forstjóra Marels og Sæplasts/Promens. Hann lætur af störfum að eigin ósk eftir að hafa gegnt formennsku í stjórn Landsnets sl. fimm ár.

Landsnet hefur skrifað undir samning við Árna Helgason ehf. um undirbúningsvinnu vegna Þeistareykjalínu 1 og á næstu dögum verður skrifað undir samning við G. Hjálmarsson hf. vegna undirbúningsvinnu við Kröflulínu 4.

Mikilvægt er að horfa á heildarmyndina þegar horft er til framleiðslu og dreifingar orku annars vegar og náttúruverndar hins vegar. Þessi samhljómur var sem rauður þráður í erindum framsögumanna á árlegum vorfundi Landsnets í dag þar sem framtíð raforkuflutningskerfisins, eignarhald Landsnets og loftslagsmál voru m.a. í brennidepli.

Landsnet býður til árlegs vorfundar félagsins þriðjudaginn 5. apríl nk., kl. 9-11 á Hilton Reykjavík Nordica. Þar verður fjallað um hlutverk raforku í tengslum við stöðu loftslagsmála á Íslandi og áskoranir varðandi þróun og uppbyggingu raforkuflutningskerfisins.

Að venju má búast við að ferðalög á fjöllum aukist þegar páskar eru framundan og því vill Landsnet minna á að víða á hálendinu getur verið hættulega stutt upp í háspennulínur vegna mikilla snjóalaga.